گوجرانوالہ کا شہری وزیراعلیٰ کی گاڑی کے آگے لیٹ گیا

وزیراعلی پنجاب کی آمد پرگوجرانوالہ کے عوام کا امتحان لیا گیا، صبح نو بجے سے لاری اڈے پرمسافروں کو داخلے سے روک دیا گیا، سینٹرل جیل کے باہر بیٹے کے قاتلوں کی گرفتاری کیلئے شہری وزیراعلیٰ کی گاڑی کے آگے لیٹ گیا۔وزیر اعلیٰ پنجاب عثمان بزدار کے دورہ گوجرانوالہ کے موقع پر شاہانہ استقبال کیلئے لاری اڈے کو پناہ گاہ کے افتتاح سے پہلے چمکایا گیا، پولیس موبائل پھول اور پودے لانے کا کام سرانجام دیتی رہی ۔عثمان بزدار توساڑھے 11 بجے پہنچے لیکن لاری اڈہ مسافروں کیلئے صبح نو بجے ہی بند کردیا گیا ، انتظامیہ نے اطراف کے پیٹرول پمپس بھی بند کرادیئے جبکہ بسیں،ویگن اورکوچز دوسری جگہ منتقل کردی گئیں۔

وزیراعلیٰ پنجاب سینٹرل جیل پہنچے تو بیٹے کے قاتلوں کی گرفتاری کیلئے شہری درخواست دینے پہنچ گیا، سیکیورٹی اہلکاروں نے روکنا چاہا تو شہری احتجاجاً گاڑی کے آگے آکر لیٹ گیا۔بعدازاں عثمان بزدارگندم خریداری کے مرکزگئے تو اسٹیڈیم روڈ کوعوام کیلئے بند کردیا گیا، شہری راستوں میں رلتے رہے۔سرکٹ ہاوس میں رمضان پیکج کے حوالے سے بریفنگ لینے کے بعد وزیر اعلی پنجاب لاہور روانہ ہوگئے ۔