وزیراعظم عمران خان کا نام بھی دنیا کی 100 بااثر ترین شخصیات کی فہرست میں شامل

معروف جریدے ٹائم میگزین نے دنیا کی 100 بااثر ترین شخصیات کی فہرست جاری کردی، وزیراعظم عمران خان کا نام بھی شامل ہے۔ٹائم میگزین کی 100 بااثر افراد کی فہرست کو 5 کیٹیگریز میں تقسیم کیا گیا ہے، سیاستدانوں کی کیٹیگری میں پاکستانی وزیراعظم عمران خان، امریکی صدر ڈونلڈ ٹرمپ، چین کے صدر شی جن پنگ، نیوزی لینڈ کی وزیر اعظم جیسنڈا آرڈرن، اسرائیل کے وزیر اعظم بینجمن نیتن یاہو، ملائیشیا کے وزیراعظم مہاتیر محمد، متحدہ عرب امارات کے ولی عہد محمد بن زید، عیسائیوں کے روحانی پیشوا پوپ فرانسس سمیت 26 شخصیات کو شامل کیا گیا ہے۔میگزین نے وزیراعظم عمران خان کے بارے میں لکھا ہے کہ انہوں نے 1992ء کا ورلڈ کپ جیتنے کے بعد ورلڈ کلاس کینسر اسپتال بنایا اور پھر ایسی یونیورسٹی تعمیر کی جس کے بارے میں تصور بھی نہیں کیا جاسکتا تھا، جس کے بعد انہوں نے پاکستانی سیاست کے ڈرٹی بزنس میں قدم رکھا۔

ٹائم میگزین کی آئیکون کیٹیگری میں گلوکارہ ٹیلر سوئفٹ، لیڈی گاگا اور مشیل اوباما سمیت 14 شخصیات کے نام شامل ہیں، ٹائٹنز کیٹیگری میں سب سے اوپر مصر کے فٹبالر محمد صلاح کا نام ہے، ان کے بھارت کے امیر ترین شخص مکیش امبانی، امریکن گالفر ٹائیگر ووڈز، فیس بک کے بانی مارک زکر برگ سمیت 15 افراد کو اس کیٹیگری میں شامل کیا گیا ہے۔ٹائم میگزین نے فنکاروں کی کیٹیگری میں دی راک کے نام سے مشہور اداکار و ریسلر ڈوین جونسن، گیم آف تھرونز کی خلیسی امیلیا کلارک، گلوکارہ آریانا گرینڈ سمیت 17 افراد کے نام شامل ہیں۔پائنیر کیٹیگری میں جاپانی ٹینس اسٹار ناﺅ می اوساکا، امریکی کامیڈین حسن منہاج، امریکن شیف ثمین نصرت سمیت 20 افراد شامل کیا گیا ہے۔