PPP کا ٹرین مارچ لاڑکانہ پہنچ گیا

پیپلزپارٹی کا ٹرین مارچ لاڑکانہ پہنچ گیا ہے۔ اسٹیشن پہنچنے پر بلاول بھٹو زرداری کے قافلے کا شاندار استقبال کیا گیا۔ پیپلزپارٹی کی قیادت نے بذریعہ ٹرین کراچی سے لاڑکانہ کا سفر 42 گھنٹے میں طے کیا۔ بلاول نے کراچی سے لاڑکانہ تک 25 سے زائد مقامات پر کارکنان سے خطاب کیا۔پیپلزپارٹی کا کاروانِ بھٹو لاڑکانہ پہنچا تو جیالوں نے اپنے قائد کا والہانہ استقبال کیا اور رقص پیش کیا۔ کارکنوں کا جوش دیکھ  کر بلاول بھٹو نے نعرے لگائے۔

خطاب کے دوران بلاول بھٹو زرداری کی آواز بیٹھ گئی مگر حکومت پر تنقید کے دوران جوش بھر آیا اور کہا کہ عمران خان کا ہر وعدہ اور دعویٰ جھوٹا نکلا۔ بلاول بھٹو نے کہا کہ ہم حکومت نہیں گرائیں گے،اب جو کال دینگے وہ لانگ مارچ کی ہوگی۔ انھوں نے مزید کہا کہ احتساب کے نام پر سیاسی انتقام کا نشانہ بنایا جارہا ہے، احتساب کے نام پر پولیٹیکل انجینئرنگ قبول نہیں، عمران خان کا  ہر وعدہ اور دعویٰ جھوٹا نکلا۔بلاول بھٹو نے طنزیہ کہا کہ عمران خان کی بہن علیمہ خان اپنی سلائی مشین ہمیں بھی دے دیں، سندھ کی خواتین بھی امریکا میں پراپرٹی خرید لیں گی۔ بلاول بھٹو نے چاراپریل کو لاڑکانہ میں جلسے کا اعلان کیا۔