کراچی والوں کے لیئے خوشخبری پی ایس ایل کے لاہور میں ہونے والے میچز کراچی منتقل

پی ایس ایل سیزن 4 کے پاکستان میں ہونے والے تمام میچز کراچی میں ہونگے۔ یہ فیصلہ لاجسٹکس اور پروازوں کے مصروف شیڈول کے باعث کیا گیا ہے۔ وزیراعلیٰ سندھ مراد علی شاہ نے کہا ہے کہ کراچی میں پی ایس ایل میچز کیلئے ہماری تیاری مکمل ہے۔پی ایس ایل 4 کے 3 میچز لاہور میں شیڈول تھے جو 9 ، 10 اور 12 مارچ کو قذافی اسٹیڈیم میں ہونے تھے۔ تاہم لاجسٹک مسائل اور پروازوں کا شیڈول متاثر ہونے کی وجہ سے یہ ممکن نہیں ہوگا۔ چئیرمین پی سی بی احسان مانی نے بتایا ہے کہ پاکستان میں میچز کا آغاز اب 9 مارچ سے ہوگا، یہ ایک مشکل فیصلہ تھا۔ چیئرمین پی سی بی نے بتایا کہ 9 مارچ کو لاہور قلندرز اور اسلام آباد یونائیٹڈ مدمقابل آئیں گی۔ 10مارچ کو کراچی کنگز اور کوئٹہ گلیڈی ایٹرز کا مقابلہ ہوگا۔ 11مارچ کو لاہور قلندرز اور ملتان سلطانز کا مقابلہ ہوگا۔ کراچی کنگز اور پشاور زلمی کا میچ بھی 11 مارچ کو ہی ہوگا۔ نیشنل اسٹیڈیم میں 13مارچ کو کوالیفائر،14 اور 15 مارچ کو ایلیمینیٹرز ہوں گے۔

دبئی میں پی ایس ایل انتظامیہ اور فرانچائز کے مالکان کے درمیان میٹنگ ہوئی ہے جس میں میچز کی منتقلی کا فیصلہ کیا گیا ہے۔ اس کے علاوہ غیر ملکی کھلاڑیوں کو بھی سیکورٹی کے حوالے سے بریفنگ دی گئی ہے۔وزیراعلی سندھ مراد علی شاہ نے کہا ہے کہ دو سال پہلے ایک میچ کراچی کے لیے مانگا تھا اور اب پی ایس ایل کے سارے میچز کراچی آرہے ہیں۔ یہ ایک چیلنج ہے جس کو قبول کریں گے ۔ کراچی میں پی ایس ایل میچز کیلئے ہماری تیاری مکمل ہے۔اس کے علاوہ کراچی نیشنل اسٹیڈیم کے نظام رینجرزنے سمبھال لیا ہے۔ پی ایس ایل کےمیچزکے لیے نیشنل اسٹیڈیم کی سیکیورٹی ہائی الرٹ کردی گئی ہے۔