جسٹس عظمت سعید نے سندھ حکومت کی صلاحیت پر سوال اٹھا دیا

سپریم کورٹ نے سندھ حکومت کو چنگ چی رکشوں کے معائنے کا عمل تیز کرنے کا حکم دے دیا۔ جسٹس عظمت سعید نے سندھ حکومت کی صلاحیت پر سوال اٹھاتے ہوئے کہا کہ لگتا ہے سندھ حکومت کے پاس انسپیکشن کی صلاحیت ہی نہیں ہے۔سپریم کورٹ میں چنگ چی رکشہ سے متعلق عدالتی فیصلے پر توہین کیس کی سماعت ہوئی۔ جسٹس عظمت سعید نے استفسار کیا کہ سندھ حکومت نےاب تک کتنے رکشوں کا معائنہ کیا ہے۔ اس پر ایڈیشنل ایڈووکیٹ جنرل سندھ نے بتایا کہ دوسو آٹھ رکشوں کو رجسٹرڈ کرچکے ہیں۔ موٹرسائیکل رکشوں کی اجازت دی ہی نہیں جا سکتی۔

جسٹس عظمت سعید نے ریمارکس دیئے کہ عدالتی حکم پرعمل نہ ہو تو حکم دینے کا کیا فائدہ ہے۔ لگتا ہے سندھ حکومت کے پاس انسپیکشن کی صلاحیت ہی نہیں۔ پنجاب کا حال بھی ایسا ہی ہوگا۔عدالت نے چاروں صوبوں کی جمع کرائی گئی رپورٹس درخواست گزاروں کو فراہم کرنے کا حکم دیتے ہوئے کیس کی مزید سماعت ایک ماہ کیلئے ملتوی کردی۔