اس بار گرمییو ں میں کم بارش ہو گی ، محکمہ موسمیات

محکمہ موسمیات نے رواں برس گرمیوں کے موسم میں بارشیں کم ہونے کی پیش گوئی کی ہے۔سماء کے پروگرام نئی بات میں بات کرتے ہوئے ترجمان محکمہ موسمیات نے بتایا کہ سیلاب یا سپرفلڈ کی پیشگوئی بے بنیاد ہے، فلڈ تو آسکتا ہے مگر سُپر فلڈ کا خطرہ نہیں ہے۔

ترجمان محکمہ موسمیات نے بتایا کہ اس بار گرمیوں میں کم بارشوں کا امکان ہے۔اس سے قبل ،گذشتہ روز وزیر آبی وسائل فیصل واؤڈا کی زیرِ صدارت ارسا ہیڈ کوارٹرمیں اجلاس ہوا جس میں چیئرمین ارسا نے دریاؤں میں پانی کےبہاؤ اورڈیمزمیں پانی سےمتعلق بریفنگ دی۔ فیصل واؤڈا نے بتایا کہ کسی صوبے کے ساتھ ناانصافی نہیں ہونے دیں گے،تمام صوبوں کو ان کے حصے کے مطابق پانی ملے گا۔

فیصل واؤڈا نے پانی کا بہاؤ ناپنے کیلئے جدید ٹیلیمیٹری نظام لگانےکی ہدایت کی اور کہا کہ صوبہ بلوچستان میں پانی کی فراہمی ہر صورت ممکن بنائی جائے۔ارسا نے بریفنگ میں بتایا کہ اس وقت دریاؤں میں پانی کا بہاؤ پچھلے سال سے بہتر ہے اور صوبہ سندھ کو منگلا ڈیم سے بھی پانی سپلائی کیا جارہا ہے جبکہ گڈو بیراج میں بھی پانی کا بہاؤ گزشتہ سال سے بہتر ہے۔