پاکستان میں بھارت سے زائد المیعاد بھارتی آم کا گودا ڈمپ کیے جانے کا انکشاف

پاکستان میں بھارت سے زائد المیعاد بھارتی آم کا گودا ڈمپ کیے جانے کا انکشاف ہوا ہے۔آل پاکستان فروٹ اینڈ ویجیٹیبل ایکسپورٹرز امپورٹرز ایسوسی ایشن نے وزارت تجارت اور وزارت خزانہ سمیت وزیر اعظم کے مشیر برائے تجارت کو ارسال کردہ ہنگامی مراسلے میں زائد المیعاد آم کے گودے کی شپمنٹ کی تصاویر اور دیگر ثبوت فراہم کردیے۔زائد المیعاد بھارتی آم کا گودا پاکستان کے مختلف شہروں میں پہنچا دیا گیا۔ آل پاکستان فروٹ اینڈ ویجی ٹیبل ایکسپورٹرز امپورٹرز ایسوسی ایشن نے ٹرک پر لدے ڈرموں کی تصاویر لیکر بھانڈہ پھوڑ دیا۔تجارتی پالیسی اور قوانین کی خلاف ورزی کرتے ہوئے زائد المیعاد بھارتی آم کا گودا پاکستان کے مخلتف شہروں میں کیسے سپلائی کیا گیا؟ یہ معمہ ابھی حل ہونا باقی ہے۔ حالیہ تصاویر سے پتا چلا کہ بارہ جون 2017 کو تیار ہونے والا آم کا گودا بھارتی ریاست تامل ناڈو میں بنایا گیا تھا جس کی قابل استعمال مدت 11 دسمبر 2018 کو ختم ہوگئی۔