شارجہ اسٹیڈیم میں پاکستان اور آسٹریلیا کے درمیاندوسرا ایک روزہ میچ آج اتوار کو کھیلا جائے گا

متحدہ عرب امارات کے شارجہ اسٹیڈیم میں پاکستان اور آسٹریلیا کے درمیان دوسرا ایک روزہ میچ آج اتوار کو کھیلا جائے گا۔اس سے قبل شارجہ اسٹیڈیم میں کھیلے گئے پہلے ون ڈے میچ میں آسٹریلیا نے میزبان پاکستان کو 8 وکٹ سے شکست دے کر کامیابی حاصل کرکے مہمان ٹیم کے خلاف ایک صفر کی برتری حاصل کرلی ہے۔

پہلے ون ڈے کی شکست کے بعد کپتان شعیب ملک نے دوسرا ون ڈے جیتنے کی امید کا اظہار کیا ہے۔ دوسرے ایک روزہ میچ کیلئے ٹیم نے تیاری مکمل کرلی ہے۔ دوسری جانب سنچری میکر آسٹریلوی کپتان ایرون فنچ بھی دوسری فتح کیلئے پر امید ہیں۔پانچ میچز کی سیریز کا دوسرا میچ اتوار کو شام 4 بجے شروع ہوگا۔ دوسرے ون ڈے میں سری لنکا کے کمار دھرما سینا اور پاکستان کے شوذب رضا امپائرنگ کریں گے، جب کہ مائیکل گف تھرڈامپائر ہوں گے۔ یہاں یہ بات بھی قابل ذکر ہے کہ پاکستان نے آسٹریلیا کے خلاف سال 2002سے کوئی ون ڈے سیریز نہیں جیتی ہے۔دونوں ممالک کے درمیان کھیلے گئے میچز میں آسٹریلیا نے 63، جب کہ پاکستان نے 32 میچز میں کامیابی حاصل کی۔ سیریز میں کامیابی کی صورت میں پاکستان ون ڈے رینکنگ میں پانچویں نمبر پر آ جائے گا۔دونوں ممالک کے درمیان یہ سیریز ورلڈ کپ کرکٹ 2019 سے صرف دو ماہ کی دوری پر ہو رہی ہے، جس کے باعث سیریز اہمیت اختیار کر گئی ہے۔ ورلڈ کپ کے لئے پاکستانی اسکواڈ کا اعلان راول پنڈی میں پاکستان کپ کے بعد کیا جائے گا۔