پیپلزپارٹی کے کارروانِ بھٹو میں شرکت کیلئےرقم کی لالچ دیکر لایا گیا۔ ٹرین مارچ میں شریک خواتین کا انکشاف

پیپلزپارٹی کے کارروانِ بھٹو میں شرکت کیلئے مبینہ طور پر معاوضہ ادا کیے جانے کا انکشاف سامنے آیا ہے۔ ٹرین مارچ میں شریک خواتین کے مطابق انہیں رقم دیکر لایا گیا۔نوشہروفیروز کے علاقے ہالانی میں منتخب نمائندوں نےمارچ میں شرکت کیلئے خواتین سے فی کس دو ہزار روپے دینے کا وعدہ کیا تھا۔نوشہروفیروز میں خواتین شرکاء نے بتائی گئی رقم سے کم ملنے پر میڈیا کے سامنے سب بتا دیا۔ خواتین کا موقف تھا کہ ہم سے 2 ہزار کا وعدہ کر کے لایا گیا لیکن صرف 2 سو روپے تھما دیے گئے۔

ایک خاتون نے میڈیا نمائندوں کو بتایا کہ میں بیوہ خاتون ہوں، لیکن 2 ہزار نہیں 200 روپے ہی دیے گئے ہیں، سب غریبوں کو اتنی ہی رقم ملی ہے۔مارچ میں شریک ایک اور خاتون سے استفسار کیا گیا کہ آپ کو 2 ہزار روپے اور ساتھ چینی بھی دی گئی ہے، لیکن انہوں نے بھی انکار کیااور بولیں کہ غریبوں کو کچھ نہیں ملا ، بس 2 سو روپے ملے ہیں۔دوسری جانب پیپلزپارٹی کے مقامی ایم پی اے ممتاز چانڈیو نےتمام الزامات کو مخالفین کی سازش قرار دیتے ہوئے کہا کہ یہ مخالفین کا پروپیگنڈا ہے، مخالفین نے 2، 3 خواتین بھیجی ہیں۔