ویسٹ انڈیز کے کھلاڑی ڈیرن سیمی کو خوشخبری ملنے کا امکان

گیانا: کرکٹ ویسٹ انڈیز کے نومنتخب صدر رکی سکیرٹ نے بڑا اعلان کردیا، کہتے ہیں ڈیرن سیمی سمیت ملک کے ہر کھلاڑی کو ٹیم کی نمائندگی کا برابر موقع فراہم کیا جائے گا۔تفصیلات کے مطابق حال ہی میں ویسٹ انڈین بورڈ کے صدر کا عہدہ سنبھالنے والے رکی سکیرٹ کے بیان نے اپنے ملک کیلئے دو مرتبہ ٹی ٹوینٹی ورلڈکپ جیتنے والے کپتان ڈیرن سیمی کی ٹیم میں واپسی کی امید جگا دی ہے۔سیمی نے کئی برس ویسٹ انڈیز کی قیادت کی اور اپنی ٹیم کو 2012 اور 2016 کے ورلڈ ٹی ٹوینٹی ٹائٹل بھی جتوائے۔

ڈیرن سیمی نے 2016 میں ورلڈ ٹی ٹوئنٹی جیتنے کے بعد اس وقت کے بورڈ کے صدر ڈیو کیمرون پر تنقید کی تھی جس کے بعد ان کے اور کرکٹ ویسٹ انڈیز کے درمیان تعلقات خراب ہوگئے تھے۔ورلڈ ٹی ٹوینٹی 2016 کا ٹائٹل جیتنے کے بعد سے ڈیرن سیمی ٹیم سے دور ہیں تاہم اب ویسٹ انڈین بورڈ کے نومنتخب صدر رکی سکیرٹ نے ڈیو کیمرون کے 6 سالہ عہد کا آئینی طریقے سے خاتمہ کیا اور کہا کہ اب سب کو موقع دیا جائے گا۔

انہوں نے ایک بیان میں کہا کہ سلیکشن سے میرا تعلق نہیں ہے، سلیکٹرز سے امید کرتا ہوں کہ وہ ڈیرن سیمی سمیت تمام کھلاڑیوں کی کارکردگی کا جائزہ لے کر ٹیم منتخب کریں گے۔انہوں نے مزید کہا کہ ڈیرن سیمی اور میرے بہت اچھے تعلقات ہیں۔ اس تمام تر صورتحال کے بعد اس بات کا روشن امکان ہے کہ ڈیرن سیمی ویسٹ انڈین ٹیم کا حصہ بن سکتے ہیں۔