کراچی کے علاقے پاک کالونی میں گزشتہ رات منشیات فروشوں کی فائرنگ سے جاں بحق پولیس اہکار کی نماز جنازہ پولیس لائنز میں ادا کر دی گئی

کراچی کے علاقے پاک کالونی میں گزشتہ رات منشیات فروشوں کی فائرنگ سے جاں بحق پولیس اہکار کی نماز جنازہ پولیس لائنز میں ادا کر دی گئی۔نماز جنازہ میں آئی جی سندھ سمیت اعلیٰ افسران نے شرکت کی، مقتول اہلکار کی تدفین لیاقت آباد سی ون ایریا میں کی جائے گی۔گزشتہ روز سادہ کپڑوں میں ملبوس موٹر سائیکل سوار پولیس اہلکار پاک کالونی پہنچے تو تنگ گلی میں گھات لگائے ملزمان کی فائرنگ سے ایک اہلکار شدید زخمی ہوگیا۔

پولیس اہلکار کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گیا۔ پولیس اہلکاروں نے بھی جوابی کارروائی کی مگر ملزم فرار ہوگئے۔ڈی ایس پی پاک کالونی غلام اکبر چانڈیو نے پولیس اہلکار کی ہلاکت کی تصدیق کرتے ہوئے کہا ہے کہ جائے وقوعہ سے نائن ایم ایم کے آٹھ خول ملے ہیں جب کہ تحقیقات شروع کر دی گئی۔آئی جی سندھ نے واقعے کا نوٹس لیتے ہوئے ایس ایس پی ویسٹ سے رپورٹ طلب کرلی ہے۔